Февраль 17 лунö - коми-пермяцöй кывлöн лун.

Коми-пермяцкöй кыв зорöтöмкöт пыдына йитсьö миян колледжлöн история. Аслас аркмöмсянь (1927 восянь) колледж готовитö велöтiссезöс, кöдна уджалöны округ пасьта школаэын да велöтöны челядёккезöс чужан кыв вылын. Öнi 101, 201, 301 да 401 группаэзын велöтчöны куимдасся унажык студент, кöдна лöсьöтчöны уджавны коми школаэзын. Коми-пермяцкöй кыв да литература сьöртi тöдöммез, кыв дынö радейтöм нылö сетö Валентина Васильевна Федосеева. Сiя кыкдас вося унажык уджалö колледжын, öтлаын сыкöт студенттэз гижисö неöтiк курсовöй да дипломöй удж, чулöтiсö ассяма коми рыттэз, лэдзисö кывчукöр, участвуйтiсö конференцияэзын, ветлiсö экспедицияэзö да öктiсö материал.

Колледжын уджалiсö велöтiссез, кöдна керисö велöтчан небöггез, кывчукöррез коми-пермяцкöй кыв сьöртi: Михаил Лихачев, Андрей Зубов, Анна Мосшегова, Анна Спорова, Зоя Распопова, Галина Калина, Галина Немтинова, Маргарита Галкина.

Колледжын ас кадö велöтчисö студенттэз, кöдна одзлань йитисö ассиныс олан коми-пермяцкöй кыв исследуйтöмöн: Антонина Кривощекова-Гантман (филологическöй наукаэз сьöртi кандидат, тöдчана учёнöй-лингвист, кывчукöррез лöсьöтiсь),  Раиса Баталова (филологическöй наукаэз сьöртi доктор, кöда пыдына исследуйтiс коми-пермяцкöй диалекттэз), Елена Федосеева, Татьяна Меркушева, Елена Гордеева (филологическöй наукаэз сьöртi кандидаттэз).

Колледжын велöтчисö и миян гижиссез – Василий Климов, Галина Бачева.

Чайтам, мый и одзлань колледж пуктас пай коми-пермяйкöй кыв зорöтöмö. 

Zircon - This is a contributing Drupal Theme
Design by WeebPal.